Seymur Həzi: həbsin 3, ailə həyatı qurmasının 1 ili
Jurnalist Seymur Həzinin həbsindən 3 il keçir.
“Azadlıq” qəzetinin əməkdaşı, AXCP-nin öncül şəxslərindən olan Seymur Həzi 2014-cü il avqustun 29-da tutulub. Məhərrəm Həsənov adlı şəxsə xəsarət yetirməkdə ittiham olunan jurnalist Abşeron Rayon Məhkəməsinin hökmü ilə 5 il müddətinə azadlıqdan məhrum edilib.
Seymur Həzi ittihamı rədd edir və hakimiyyəti tənqid edən yazılarına, çıxışlarına görə həbs olunduğunu bildirir.
Bu ay məhbus jurnalistin həm də ailə həyatı qurmasının bir ili tamam olur. 2016-cı ilin avqustunda Seymur Həzi gənc fəal Nigar Yaqublu ilə ailə qurub.
Avqustun 29-da Novator.az-a açıqlama verən Nigar Həzi deyib ki, həyat yoldaşı ilə hər həftə görüşə bilir.
Seymur Həzi 17 saylı Cəzaçəkmə Müəssisəsində saxlanır. Nigar Həzinin sözlərinə görə, həyat yoldaşının səhhətindən, saxlanma şəraitindən gileyi yoxdur: “Bu şəraitdə evləndik, mövcud durumdan da şikayətçi deyilik. Əlbəttə, bir yerdə yaşasaq daha gözəl olar, tam bir ailə olardıq. Bütün bunlara baxmayaraq Seymurun əhval-ruhiyyəsi yaxşıdır. Ölkədə baş verən hər şeydən xəbərdardır. İndi elə bir vəziyyətə gəlib çıxmışıq ki, həbslər olmayanda təəccüb edirsən. Görüşəndə ictimai-siyasi məsələləri də müzakirə edirik.
Seymur həbsxana divarları arxasında olsa da, vaxtını səmərəli keçirməyə çalışır, coxlu mütaliə edir, bir neçə xarici dil öyrənir. Ona xeyli kitab aparmışam”.
Nigar Həzi qeyd edib ki, Seymur Həzi digər ailə üzvləri ilə də görüşə bilir.
