Qarabağ elçiləri (25 ildə neçə həmsədr olub?)
ABŞ-dan ATƏT-in Minsk qrupuna yeni həmsədr təyin edildi: Endrü Skofer. O, müvəqqəti həmsədr Riçard Hoqlandı əvəzləyib.
Novator.az bildirir ki, Endrü Skofer Minsk qrupunda ABŞ-dan 12-ci, ümumən 30-cu həmsədrdir.
Dağlıq Qarabağ münaqişəsinin dinc yolla tənzimləməsi üçün 1992-ci ildə yaradılan Minsk qrupunun 11 üzvü var: Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.
Minsk qrupunun ilk sədri (1992-1994) italyan Mario Rafaelli olub.
1994-cü ildə həmsədrlik institutu yaradılıb. Hazırda Endrü Skoferlə yanaşı Fransadan Stefan Viskonti, Rusiyadan İqor Popov həmsədrlik edirlər.
İndiyədək həmsədr postunda bu diplomatlar çalışıb:
İsveç – Yan Eliasson;
Finlandiya – Rine Niberq;
Rusiya – Vladimir Kazimirov, Valentin Lozinski, Yuri Yukalov, İqor Studennikov, Nikolay Qribkov, Yuri Merzlyakov;
Fransa – Jak Blo, Jorj Vojye, Jan Jak Qayard, Filip de Sürmen, Anri Jakole, Bernar Fasye, Jak For; Pyer Andriyo;
ABŞ – Stroub Telbott, Cozef Pressel, Linn Pasko, Donald Kayzer, Kerri Kavano, Rudolf Perina, Stiven Mənn, Metyu Brayza, Robert Bradtke, Ceyms Uorlik, Riçard Hoqland.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən sürətlənən hərbi təcavüzdə Dağlıq Qarabağ və onun ətrafındakı 7 rayon işğal edilib. 1994-cü ildə elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
Hazırda sülh danışıqları Madrid prinsipləri əsasında aparılır. Minsk qrupu həmsədrlərinin – Rusiya, Fransa və ABŞ-ın 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılması şərti ilə bölgənin yekun statusunun müəyyənləşməsini nəzərdə tutur.
