Siyasi məhbusların yeni siyahısı açıqlanıb
Siyasi məhbusların yeni siyahısı açıqlanıb. Novator.az-ın məlumatına görə, hüquq müdafiəçiləri İntiqam Əliyev, Rəsul Cəfərov, hüquqşünas Ənnağı Hacıbəyli, jurnalistlər Şahvələd Çobanoğlu, Rövşən Hacıbəyli və başqalarının tərtib etdiyi siyahıda 160 şəxsin adı var.
Sənəd müəllifləri bildirir ki, 158 işdə siyasi motivli həbsin baş verdiyi təsbit olunub, həmin şəxslər siyasi məhbus kimi tanınıb, 2 iş hələ müşahidə altındadır.
Siyahıdakı şəxslərin 10-u jurnalist və bloqçu, 2-si ədib, 1-i hüquq müdafiəçisi, 11-i ictimai- siyasi fəal, 97-si inanclı fəal, 3-ü ömürlük məhbusdur.
Siyahıya sosial etirazlarda iştirak etdiyi üçün tutulan 19 nəfər, 2 keçmiş dövlət qulluqçusu daxil edilib.
Siyasi girovlar bölümündə 3 nəfərin işindən bəhs olunur, həmin şəxslərin tənqidçi qohumlarına təsir göstərmək, yaxud onları cəzalandırmaq üçün həbs edildiyi vurğulanır.
Daha 10 nəfər silahlı birlik yaratmaq və başqa ağır cinayətlər ittihamı ilə tutulmuş Səid Dadaşbəylinin işi üzrə həbsdədir.
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
