“Samsunq”un rəhbəri həbs cəzası aldı
Cənubi Koreyada məhkəmə “Samsunq” şirkətinin rəhbəri Li Çje Yona 5 il həbs cəzası kəsib. Novator.az-ın məlumatına görə, Li Çje Yon rüşvət alma, mənimsəmə, qanunsuz gəlir əldə etmə, xaricə qeyri-qanuni vəsait köçürmə və yalançı şahidlikdə təqsirli bilinib.
Hökmə əsasən, Li Çje Yon sabiq prezident Pak Kın Henin yaxın rəfiqəsi Çoy Sun Silin qızı üçün at idmanı təlimlərinə və avadanlıqlarına 6,38 milyon dollar pul ayırıb.
2016-cı il dekabrın 9-da Cənubi Koreya parlamenti prezidentin istefasına səs verib. Pak Kın He rəfiqəsi Çoy Sun Sili hökumət işlərinə qarışdırmaqda günahlandırılıb. Çoy Sun Silə korrupsiya, vəzifə səlahiyyətlərindən sui-istifadə ittihamları irəli sürülüb. Bu ilin iyun ayında Çoy Sun Sil 3 il müddətinə azadlıqdan məhrum edilib.
2017-ci il martın 10-da Cənubi Koreyanın Konstitusiya Məhkəməsi prezident Pak Kın Henin istefaya göndərilməsi barədə qərarı təsdiqləyib.
Pak Kın He martın 31-də tutulub. Onun “Samsunq” şirkətindən külli miqdarda rüşvət alınmasına bağlı olduğu, vəzifə səlahiyyətlərindən sui-istifadə edərək gizli informasiyanı üçüncü şəxsə ötürdüyü bildirilir. Bütövlükdə bu iş üzrə 30-dan çox şəxs ittiham olunur.
Səidə Hüseynova
