İnternetdə anonim şərh yazmaq aradan qaldırılır
Çində internetdə anonim şərh yazmaq imkanı aradan qaldırılır. Hökumətin qoyduğu yeni qaydaya əsasən, internetdə yalnız şəxsiyyət vəsiqəsindəki məlumatları daxil etməklə qeydiyyatdan keçmiş adam şərh yaza bilər.
Novator.az xəbər verir ki, yeni qayda oktyabrın 1-dən qüvvəyə minir.
Qaydaya görə, şərh yazmaq imkanı yaratmış bütün internet resursları, o cümlədən internet forumları istifadəçilərdən şəxsiyyət vəsiqəsindəki məlumatları daxil etməklə qeydiyyatdan keçmə proseduru tətbiq etməlidir. Özü də təkcə yeni istifadəçilər yox, köhnə istifadəçilər də bu qaydada yenidən qeydiyyatdan keçməlidir.
Hökumət yeniliyi internetdə yazılan şərhlərin mədəni və elmi səviyyəsini yüksəltmək məqsədi ilə izah edir. Rəsmi açıqlamaya görə, yeni üsul sağlam internet icmasının inkişafına yardım göstərəcək, fiziki və hüquqi şəxslərin maraqlarını qoruyacaq.
Yeni qayda ilə bağlı hökumət sərəncamında sahibkarların, administratorların və internet platformalarında çalışan digər əməkdaşların yayımlama, yenidən dərc etmə, məlumatı silmə və başqa buna oxşar yollarla qanunazidd faydalar əldə etməsi də yasaqlanır.
Səidə Hüseynova
