“Qarabağ”ın daha üç mümkün rəqibi bəlli oldu
UEFA Çempionlar Liqasının qrup mərhələsinə çıxmaq şansı olan Azərbaycan komandası “Qarabağ”ın daha üç mümkün rəqibinin adı bilinib. Novator.az-ın məlumatına görə, avqustun 22-də İspaniyanın “Sevilya”, İtaliyanın “Napoli”, Yunanıstanın “Olimpiakos” komandaları qrupa vəsiqə alıblar.
“Qarabağ” avqustun 23-ü Danimarka paytaxtında “Kopenhagen” komandası ilə görüşür. Dördüncü mərhələnin Bakıda keçirilmiş ilk matçında “Qarabağ” 1:0 üstün gəlib və bu gün onu bir top fərqi ilə məhsuldar məğlubiyyət də (1:2, 2:3 və s.) qane edir.
Qrupa düşəcəyi halda “Qarabağ” dördüncü – sonuncu səbətdə yer alacaq və püşk ona yuxarı səbətlərdən üç komandanı rəqib edəcək.
Birinci səbətdə İspaniyanın “Real”, Almaniyanın “Bavariya”, İngiltərənin “Çelsi”, İtaliyanın “Yuventus”, Portuqaliyanın “Benfika”, Fransanın “Monako”, Rusiyanın “Spartak” (Moskva), Ukraynanın “Şaxtyor” komandaları yer alır.
İkinci səbətə İspaniyanın “Barselona”, “Atletiko”, “Sevilya”, Fransanın PSJ, Almaniyanın “Borussiya” (Dortmund), İngiltərənin “Mançester Siti”, “Mançester Yunayted”, Portuqaliyanın “Portu” komandaları salınıb.
Üçüncü səbətdə Belçikadan “Anderlext”, İsveçrədən “Bazel”, İngiltərədən “Tottenhem”, İtaliyadan “Roma”, “Napoli”, Türkiyədən “Beşiktaş”, Yunanıstandan “Olimpiakos” var. İngiltərənin “Liverpul” komandası da bu səbətə düşə bilər.
