Şirkətlər gəncləri niyə işə götürmür?
Rusiyada gəncləri işə götürən şirkətlərin sayı azalır. İki il qabaq şirkətlərin 89%-i gəncləri işə götürürdü. İndi bu rəqəm 74%-ə düşüb. Bunu “HeadHunter” tədqiqat xidmətinin və Career.ru portalının apardığı araşdırmalar üzə çıxarıb.
Novator.az xəbər verir ki, araşdırmanın nəticəsi avqustun 22-də açıqlanıb.
Nəticələr göstərir ki, rusiyalı sahibkarlar təcrübəsiz namizədləri işə götürməyə maraq göstərmir və bu tendensiya getdikcə güclənir. Müəssisələrin dörddə birində isə ümumiyyətlə hazırlıqsız şəxslər işə götürülmür. İki il qabaq şirkətlərin beşdə birində belə ənənə vardı.
İşəgötürənlər təcrübəsiz namizədlərə marağın olmamasını bir neçə səbəblə izah edirlər. Onların 36%-i bildirib ki, gənc mütəxəssislər həddən artıq ambisiyalıdır, eyni zamanda yüksək əməkhaqqı almağa iddialıdır.
Sorğuda iştirak edən sahibkarların 27%-i qeyd edib ki, gənc kadrlara təlim keçmək lazım gəlir, onların şirkətində isə buna vaxt yoxdur.
Sahibkarların 27%-i müəssisələrində ixtisar apardığını, 9%-i isə təcrübəsiz işçilərin səhvlərindən çəkindiklərini əsas gətirib.
Tədqiqatda iştirak edən və bu il təcrübəsiz namizədləri işə götürən şirkətlərin rəhbərləri gənc kadrların üstün cəhətlərini açıqlayıblar. Onlar deyiblər ki, gənclər az pula da işləməyə hazırdırlar, yeni işi tez qavrayırlar və daha yaradıcıdırlar. Onlar ali məktəb məzunlarının daha yaşlı adamlarla müqayisədə yeni biliklərə malik olduğunu da vurğulayıblar.
Səidə Hüseynova
