Hasilat razılaşması barədə xəbər qiyməti artırıb
Avqustun 22-si dünya birjalarında neftin qiyməti artıb. Nyu-York birjasında “Layt” markalı neftin bir barreli 16 sent bahalaşaraq 47,53 dollar, London birjasında “Brent” markalı neftin bir barrelinin qiyməti 20 sent yüksələrək 51,86 dollar olub.
AZƏRTAC xəbər verir ki, “AzəriLayt” markalı neftin bir barreli 33 sent bahalaşaraq 53,72 dollara qalxıb.
Bu, büdcə qiymətindən 13,72 dollar yuxarı qiymətdir. Azərbaycanın 2017-ci il büdcəsində neftin qiyməti 40 dollar hesablanıb.
Novator.az xatırladır ki, mayın 25-də iri neft ölkələrini birləşdirən OPEK-in Nazirlər Şurası neft hasilatının azaldılması barədə sazişin müddətini 2018-ci il aprelin 1-dək uzadıb. Təşkilata daxil olmayan 11 ölkə, o cümlədən Azərbaycan bu razılaşmaya qoşulub.
OPEK bu il yanvarın 1-dən gündəlik hasilatı iyulun 1-dək 1,2 milyon barrel azaldıb. Təşkilata daxil olmayan ölkələr hasilatı 558 min barrel düşürüb. Azərbaycan gündəlik hasilatı 35 min barrel azaltmağa razı olub.
OPEK-ə Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, Əlcəzair, Liviya, Nigeriya, Qabon, Anqola, Ekvador, Venesuela və Ekvatorial Qvineya daxildir.
Avqustun 21-i Avstriyanın paytaxtı Vyanada neft hasilatı ilə bağlı razılaşmanı qiymətləndirən Texniki Komitənin toplantısı keçirilib. Toplantıdan sonra bəyan olunub ki, 2017-ci ilin ilk yarısında razılaşmaya 98%, ötən ay 94% əməl olunub.
