Nazirlikdən işlə təminat hesabatı
Əmək və Əhalinin Sosial Müdafiəsi Nazirliyi yeni hesabat yayıb. Hesabata görə, iyulda Dövlət Məşğulluq Xidmətinin xətti ilə 2173 nəfər işsiz və işaxtaran vətəndaşın münasib işlərlə təminatı həyata keçirilib. Ümumilikdə yanvar-iyul aylarında 35827 nəfər şəxsin idarə, müəssisə və təşkilatlarda vakant iş yerlərində məşğulluğu təmin olunub. Onların 8922 nəfəri qadınlar, qalanları kişilərdir. 7 ayda işlə təmin edilənlərin 11121 nəfəri gənclər olub.
Prezidentin 7 aprel 2016-cı il sərəncamına əsasən, 1400 nəfər işsiz və işaxtaran vətəndaşa fərdi təsərrüfatlarının qurulması üçün aktivlərin (mal və materialların) verilməsi nəzərdə tutulub. Bu ilin fevral ayından bəri onlardan 860 nəfərə əsasən kənd təsərrüfatı sahələri üzrə aktivlər təqdim olunub və proses davam etdirilir.
Yanvar-iyul aylarında Dövlət Məşğulluq Xidmətinin əmək birjaları qısamüddətli iş üçün müraciət edən 1631 nəfəri müvəqqəti xarakterli işlərlə təmin edib.
Nazirliyin xətti ilə 2631 nəfər peşə hazırlığı və əlavə təhsil kurslarına, 62641 nəfər gənc peşəyönümü tədbirlərinə cəlb olunub.
