Gənc Liderlər Forumunda nələr müzakirə olunur?
Avqustun 21-i Bakıda Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə Qlobal Gənc Liderlər Forumu işə başlayıb. Forumda dünyanın 50-yə yaxın aparıcı gənc lider və tədqiqatçısı iştirak edir, Şvarzman, Rodos, Fulbrayt, Marşal, Truman, Mitcel, Geyts proqramları təmsil olunur.
Harvard, Oksford, Kaliforniya, Monpelye, Toronto, Sinxua, Leypsiq, Corctaun, Corc Vaşinqton, Sorbon, Sapienza, Con Hopkins, Pekin, Prinston, Kornell, Yel, Stenford, Braun, Kolumbiya, Liverpul, Çikaqo, Notr Dam, Miçiqan, Rotterdam, Barselona universitetlərinin, London İqtisadi və Siyasi Elmlər Məktəbinin, Paris İqtisadiyyat Məktəbinin nümayəndələri, habelə gənc iş adamları da tədbirə qatılıb. Bəzi ölkələrin sabiq hökumət başçıları, nüfuzlu ictimai xadimlər, habelə iri korporasiyaların rəhbərlərindən ibarət 20-yə yaxın ali səviyyəli qonaq Bakıya gəlib.
Forumda liderliyin fərdi qiymətləndirilməsi, müasir dövrün ehtiyac duyduğu liderlik formaları, qadın və kişi liderliyi arasındakı fərqlər, həmçinin liderliyin daxili və xarici hüdudları müzakirə olunacaq, debatlar təşkil ediləcək.
Qlobal Gənc Liderlər Forumu gənc liderləri sabiq və indiki dövlət başçıları ilə əlaqələndirən, liderliyin bir çox meyarlarını tədqiq edən yeni platformadır.
