Dağlıq Qarabağda nə qədər maaş alırlar?
İşğalçı Dağlıq Qarabağ rejimi bölgənin iqtisadi göstəricilərini açıqlayıb. Novator.az-ın məlumatına görə, rejimin “Milli Statistika Xidməti” 2017-ci ilin ilk yarısında ümumi daxili məhsulun (ÜDM) ötən ilin eyni dövrü ilə müqayisədə 15% artdığını iddia edir. 6 ayda Dağlıq Qarabağda 102,2 milyard dramlıq ÜDM istehsal olunduğu bildirilir.
“Milli Statistika Xidməti” 2017-ci ilin yanvar-iyun aylarında Dağlıq Qarabağda adambaşına 699,8 min dram (1460 ABŞ dollarından çox) ümumi daxili məhsul düşdüyünü qeyd edir.
Hesabata əsasən, bölgədə orta aylıq əməkhaqqı 151,5 min dramdır (316 ABŞ dollarından çox).
6 ayda 196,3 milyon ABŞ dolları həcmində xarici ticarət dövriyyəsi qeydə alındığı vurğulanır.
1988-ci ilin fevral ayında ermənilər Azərbaycanın Dağlıq Qarabağ bölgəsində separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
