Baş nazir prezidentlik üçün gedir
Qırğızıstanın baş naziri Sooronbay Jeenbekov prezident seçkisinə qatılmaq üçün istefa verib.
İstefaya getdiyini o, avqustun 21-də bəyan edib.
Qırğısıtanın seçki qanunvericiliyinə görə, baş nazir prezidentliyə namizəd olduqda ya seçki bitənə qədər vəzifəsinin icrasını müvəqqəti dayandırmalı, ya da istefaya getməlidir.
Novator.az-ın məlumatına görə, avqustun 21-də Mərkəzi Seçki Komissiyası Sooronbay Jeenbekova namizədlik vəsiqəsi təqdim edib.
Sooronbay Jeenbekov prezident seçkisində namizədliyi rəsmən qeydiyyata alınmış üçüncü adamdır. Digər namizədlər də vaxtilə baş nazir olublar – “Ak-Şumkar” Partiyasının lideri Temir Sarıyev və Respiblika Partiyasının lideri, deputat Omurbek Babanov.
58 yaşlı Sooronbay Jeenbekov baş nazir postunu 2016-cı ilin aprelindən tuturdu. O, ölkənin hazırkı prezidenti Almazbek Atambayevin yaxın silahdaşı sayılır, hakim Sosial Demokrat Partiyasının üzvüdür.
Qırğızıstanda növbəti prezident seçkisi oktyabrın 15-də keçiriləcək.
Konstitusiyaya əsasən, eyni adam yalnız bir dəfə prezident ola bilər. Prezidentlik müddəti 6 ildir.
Səidə Hüseynova
