UEFA-nın klub turnirlərində nə dəyişikliklər olacaq?
2018-2019-cu illər mövsümündən UEFA-nın klub turnirlərində dəyişikliklər qüvvəyə minir (İlkin reqlament). Novator.az-ın məlumatına görə, əsas yenilik Çempionlar Liqasının qrup raunduna birbaşa çıxan komandaların sayının 22-dən 26-ya artırılması olacaq. Klub reytinqində 1-4-cü yerləri tutan UEFA üzvlərinin hər birindən 4 komanda, 5-6-cı yerləri tutanların hər birindən 2 komanda, 7-10-cu yerləri tutanların çempionları, eləcə də Çempionlar Liqası və Avropa Liqasının 2018-ci il qalibləri qrup mərhələsinə birbaşa vəsiqə alacaq.
Qrupa digər 6 vəsiqənin taleyinə seçmə raundlarda aydınlıq gələcək. 4 vəsiqə çempionlar, 2 vəsiqə çempion olmayan komandalar üçün nəzərdə tutulub.
Çempionlar üçün təsnifat mərhələlərinin sayı 4-dən 5-ə artacaq. UEFA reytinqində 52-55-ci yerləri tutanların çempionları mübarizəyə ilkin təsnifatdan start verəcək. 18-51-ci mövqelərdə olan UEFA üzvləri turnirə birinci, 15-17-ci mövqelərdə olanlar ikinci, 13-14-cü mövqelərdə olanlar üçüncü, 11-12-ci mövqelərdə olanlar dördüncü mərhələdən başlayacaq.
Çempion olmayan komandalar qrupadək üç ələmə mərhələsindən keçəcək. 10-15-ci yerlərdə olan UEFA üzvlərinin milli çempionatında gümüş medal almış komandalar Çempionlar Liqasına ikinci, 5-6-cı yerləri tutan UEFA üzvlərinin bürünc mükafatçıları və 7-9-cu yerləri tutanların gümüş mükafatçıları üçüncü mərhələdən start verəcək.
Çempionlar Liqasının istənilən seçmə mərhələsindən ələnən komandalar Avropa Liqasına vəsiqə alacaq. Onlar Avropa Liqasında qrupa düşmək üçün bir-birləri ilə oynayacaq. Bu istiqamət üzrə üç ələmə mərhələsi olacaq. Sırf Avropa Liqasının komandaları isə qrupa düşmək üçün beş mərhələdə yarışacaq. Bu turnirə də ilkin təsnifat raundu əlavə olunub.
