Naxçıvanın sosial-iqtisadi göstəriciləri
Naxçıvan Muxtar Respublikasının iqtisadi və sosial göstəriciləri açıqlanıb. Novator.az-ın məlumatına görə, 2017-ci ilin yanvar-iyul aylarında muxtar respublikada 1 milyard 458,4 milyon manatlıq ümumi daxili məhsul istehsal olunduğu bildirilir . Bu, 2016-cı ilin müvafiq dövrü ilə müqayisədə 1,7 faiz çoxdur. Hər bir nəfərə düşən ümumi daxili məhsulun həcmi 5,2 faiz artaraq 3240 manatı ötüb.
Muxtar respublikanın Dövlət Statistika Komitəsi bildirir ki, ümumi daxili məhsulun tərkibində ilk yeri sənaye sahəsi tutur. Sənayedə 604 milyon 952 min manat dəyərində məhsul istehsal edilib, bu da 2016-cı ilin 7 ayının göstəricisini 1,2 faiz üstələyib.
7 ayda muxtar respublikada əsas kapitala 568,5 milyon manat dəyərində investisiya yönəldilib. Bu, bir il öncəki göstəricidən 1,1 faiz çoxdur.
2017-ci ilin yanvar-iyul aylarında kənd təsərrüfatında 2016-cı ilin müvafiq dövründən 3,4 faiz çox məhsul istehsal olunub.
7 ayda muxtar respublikanın bank və kredit təşkilatları hüquqi və fiziki şəxslərə 13,3 milyon manat məbləğində kreditlər verib.
2017-ci ilin yanvar-iyul aylarında muxtar respublikaya 224 min 936 nəfər turist gəlib (2016-cı ilin müvafiq dövrü ilə müqayisədə 4 faiz və ya 8652 nəfər çox).
Muxtar respublikada 238,3 milyon ABŞ dolları dəyərində xarici ticarət dövriyyəsi qeydə alınıb. İxracın həcmi son bir il ərzində 1,3 faiz artaraq 220,5 milyon ABŞ dolları, idxalın həcmi 23,3 faiz azalaraq 17,8 milyon ABŞ dolları təşkil edib, 202,6 milyon ABŞ dolları dəyərində müsbət saldo yaranıb.
Əhali gəlirləri 1,2 faiz artaraq 1 milyard 10,7 milyon manat, onun hər bir nəfərə düşən məbləği isə 0,2 faiz artaraq 2245,6 manat təşkil edib. Orta aylıq əməkhaqqı 414,1 manat olub.
1 iyul 2017-ci ilə muxtar respublika əhalisinin sayı bir il öncəyə nisbətdə 0,9 faiz artaraq 450 min 772 nəfərə çatıb.
