Prezidentlərin övladları Bakıya gəlir
Makedoniya və Monteneqro prezidentlərinin, həmçinin Latviya, Ukrayna, Albaniya, Andorra, Bosniya və Herseqovinanın sabiq prezident və baş nazirlərinin övladları Bakıda keçiriləcək Qlobal Gənc Liderlər Forumunda iştirak edəcəklər. Məlumat Novator.az-a Diasporla İş üzrə Dövlət Komitəsinin mətbuat xidmətindən verilib.
Qlobal Gənc Liderlər Forumu avqustun 21-24-də keçiriləcək.
Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə baş tutacaq forumda dünyanın 50-yə yaxın aparıcı gənc lider və tədqiqatçısının, bir sıra nüfuzlu proqramların təmsil olunması nəzərdə tutulur.
Foruma dünyanın müxtəlif ali təhsil ocaqlarından nümayəndələrin, gənc iş adamlarının da qatılması gözlənilir.
Forumda liderliyin fərdi qiymətləndirilməsi, müasir dövrün ehtiyac duyduğu liderlik formaları, qadın və kişi liderliyi arasındakı fərqlər, həmçinin liderliyin daxili və xarici hüdudları müzakirə olunacaq, debatlar təşkil ediləcək.
