Nikah müayinəsindən keçənlərin sayı 310 min nəfərə çatır
Bu ilin iyul ayında nikaha daxil olmaq istəyən 17793 nəfər tibbi müayinədən keçirilib. Səhiyyə Nazirliyi avqustun 17-də belə məlumat yayıb.
Nikaha daxil olmaq istəyən şəxslər 2015-ci il iyunun 1-dən müvafiq orqana təqdim etdikləri ərizəyə tibbi müayinə barədə arayış da əlavə etməlidir. Bu arayışın təqdim olunmaması nikahın bağlanmasına mane olan hallar sırasına daxil edilib.
Tibbi müayinə və məsləhətlər nikaha daxil olmaq istəyən şəxslərin və ya onlardan birinin yaşayış yeri üzrə dövlət və bələdiyyə tibb müəssisəsində pulsuz aparılır.
Rəsmi hesabata görə, nikaha daxil olmaq istəyənlərin icbari tibbi müayinəsi tətbiq olunduğu vaxtdan bu il avqustun 1-dək müayinədən 309224 nəfər keçib. 12594 nəfərdə talassemiya daşıyıcılığı, 1456 nəfərdə sifilis, 225 nəfərdə QİÇS aşkar olunub.
