Nazirlik əlillərə xidmət hesabatı verib
Bu ilin yanvar-iyul aylarında Əmək və Əhalinin Sosial Müdafiəsi Nazirliyi əlilliyi olan 11 min nəfərə yaxın şəxsi bərpa-müalicə və protez-ortopedik xidmətlərlə təmin edib. 5250 nəfərdən çox əlilliyi olan şəxsə bərpa mərkəzlərində stasionar şəraitdə reabilitasiya xidmətləri göstərilib.
Rəsmi hesabata görə, 7 ayda Protez-Ortopedik Bərpa Mərkəzi, onun Gəncə şəhərindəki filialı və Naxçıvan istehsalat sahəsinin protez-ortopedik bərpa xidmətləri göstərdiyi şəxslərin sayı 5714 nəfər olub. Həmin insanların dayaq-hərəkət sisteminin itirilmiş funksiyalarının bərpası məqsədilə ümumilikdə 17471 protez-ortopedik məmulat və reabilitasiya vasitəsi ilə təminatı həyata keçirilib. O cümlədən onlara 411 ədəd əlil arabası, 683 ədəd aşağı və yuxarı ətraf protezi, 1056 ədəd aşağı və yuxarı ətraf ortezi, 5236 ədəd müxtəlif reabilitasiya vasitəsi, 4186 cüt protez və ortopedik ayaqqabı, 243 ədəd eşitmə aparatı və s. verilib.
