Jurnalistə qarşı ittiham ağırlaşdırılıb
“Kanal 13” internet televiziyasının həbsdə olan direktoru Əziz Orucova qarşı ittihamlar ağırlaşdırılıb. Məlumatı vəkil Elçin Sadıqov yayıb.
Əziz Orucov mayın 2-də polisə müqavimətdə təqsirli bilinərək 30 sutka inzibati həbs cəzası alıb. Bu həbs müddəti başa çatmaqdaykən ona Cinayət Məcəlləsinin 192.2-ci (qanunsuz sahibkarlıq və külli miqdarda gəlir əldə etmə) və 308.2-ci (ağır nəticələrə səbəb olan vəzifə saxtakarlığı) maddələri ilə cinayət işi başlanıb və Əziz Orucov barəsində 4 aylıq həbs qətimkan tədbiri seçilib. Bundan sonra “Kanal 13″ün ofisində və Əziz Orucovun evində axtarış aparılıb. Direktorun həbsindən az sonra “Kanal 13” fəaliyyətini dayandırıb.
Avqustun 16-da Bakı İstintaq Təcridxanasında Əziz Orucovla görüşən vəkil bildirib ki, jurnalist yenə də 192 və 308-ci maddələrlə ittiham olunur. Sadəcə istintaqı aparan orqan – Baş Prokurorluğun Ağır Cinayətlərə Dair İşlər üzrə İstintaq İdarəsi bu ittihamları ağırlaşdırıb. Belə ki, Əziz Orucov dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə də təqsirli bilinir. Vəkil sözügedən qrant vəsaitlərinin əslində dövlət qeydiyyatına alındığını iddia edir.
