Gözəl Bayramlının həbs müdddəti uzadılıb
AXCP sədrinin müavini Gözəl Bayramlı barəsində seçilmiş həbs qətimkan tədbirinin müdddəti 2 ay uzadılıb.
Qərarı avqustun 17-də Nəsimi Rayon Məhkəməsinin hakimi Babək Pənahov Baş Prokurorluğun təqdimatı əsasında çıxarıb.
Gözəl Bayramlı mayın 25-i axşam Gürcüstandan Azərbaycana gələrkən Qazax rayonunun Şıxlı sərhəd nəzarət buraxılış məntəqəsində saxlanıb. Rəsmi məlumata görə, onun üstündən bəyan edilməmiş 12 min ABŞ dolları çıxıb.
Dövlət Sərhəd Xidmətinin İstintaq və Təhqiqat İdarəsində Cinayət Məcəlləsinin 206.1-ci (qaçaqmalçılıq) maddəsi ilə cinayət işi başlanıb.
Mayın 26-da Gözəl Bayramlı Bakıya gətirilib, mayın 27-nə keçən gecə Səbail Rayon Məhkəməsi onun barəsində 3 aylıq həbs qətimkan tədbiri seçib.
Mayın 26-da Gözəl Bayramlının yaşadığı və qeydiyyatda olduğu ünvanlarda axtarış aparılıb. Gözəl Bayramlının Bakının Qaraçuxur qəsəbəsində yaşadığı evdən və Nərimanov rayonunda qeydiyyatda olduğu qohumlarının evindən bəzi sənədlər və əşyalar götürülüb.
Gözəl Bayramlı hazırda Bakı İstintaq Təcridxanasında saxlanır.
AXCP, bir sıra digər müxalifət təmsilçiləri, hüquq müdafiəçiləri Gözəl Bayramlının həbsini siyasi sifariş sayır.
