Yarım addım qaldı
UEFA Çempionlar Liqasında dördüncü seçmə mərhələ start götürüb. Azərbaycan təmsilçisi “Qarabağ” avqustun 15-i Bakıda Danimarkanın “Kopenhagen” komandasını 1:0 hesabı ilə udaraq qrup mərhələsinə doğru inamlı addım atıb.
Cavab görüşü avqustun 23-ü Kopenhagendə keçiriləcək.
“Qarabağ” əvvəlki raundlarda Gürcüstanın “Samtredia” (5:0, 1:0) və Moldovanın “Şerif” (0:0, 2:1) komandalarını turnirdən kənarlaşdırıb.
Novator.az bildirir ki, 2017-2018 mövsümündə Çempionlar Liqasının qrup mərhələsinə 22 komanda birbaşa vəsiqə alıb: İspaniyadan “Real”, “Barselona”, “Atletiko”, Almaniyadan “Bavariya”, “Leypsiq”, “Borussiya” (Dortmund), İngiltərədən “Çelsi”, “Tottenhem”, “Mançester Siti”, “Mançester Yunayted”, İtaliyadan “Yuventus”, “Roma”, Portuqaliyadan “Benfika”, “Portu”, Fransadan “Monako”, PSJ, Rusiyadan “Spartak” (Moskva), Ukraynadan “Şaxtyor”, Belçikadan “Anderlext”, Hollandiyadan “Feyenoord”, Türkiyədən “Beşiktaş”, İsveçrədən “Bazel”.
Qrupa qalan 10 vəsiqə uğrunda hazırda “Qarabağ” və “Kopenhagen”lə yanaşı İspaniyanın “Sevilya”, Almaniyanın “Hoffenhaym”, İngiltərənin “Liverpul”, İtaliyanın “Napoli”, Portuqaliyanın “Sportinq”, Fransanın “Nitsa”, Rusiyanın SSKA, Türkiyənin “Başaksəhər”, İsveçrənin “Yanq Boyz”, Çexiyanın “Slaviya”, Yunanıstanın “Olimpiakos”, Rumıniyanın “Styaua”, Xorvatiyanın “Riyeka”, Kiprin APOEL, İsrailin “Hapoel” (Beer-Şeva), Şotlandiyanın “Seltik”, Qazaxıstanın “Astana”, Sloveniyanın “Maribor” komandaları yarışır.
