Ukrayna savaşı 1,3 milyona yaxın ailəni didərgin salıb
Ukraynada 1,5 milyondan çox məcburi köçkün qeydə alınıb. Novator.az xəbər verir ki, Sosial Siyasət Nazirliyi avqustun 15-nə Krım və Donbas bölgələrindən köçkün düşmüş 1 milyon 589 min 14 nəfərin (1 milyon 278 min 714 ailə) qeydə alındığını bəyan edib.
Statistikaya görə, indiyəcən məcburi köçkünlərə 1 milyard 683 milyon 333 min qrivna yardım göstərilib (1 Ukrayna qrivnası 6 qəpikdən bir qədər bahadır).
2014-cü ilin fevral ayında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib.
Ölkə ərazisinin 7,2%-i işğal olunub, dövlət sərhədinin 409,7 kilometrinə nəzarət itirilib. Silahlı münaqişə ərzində 10 minə yaxın adam həlak olub.
