“Turan”dan nə apardılar?
Vergilər Nazirliyi əməkdaşlarının “Turan” informasiya agentliyinin redaksiyasında apardığı yoxlama yekunlaşıb.
Bakının Süleyman Rəhimov küçəsi, 186 ünvanında yerləşən ofisdə yoxlama Nəsimi Rayon Məhkəməsinin çıxardığı qərarla həyata keçirilib.
Yoxlama avqustun 16-sı səhərdən başlayıb, günortayadək davam edib. Vergi nümayəndələri agentliyin ofisini saat 14 radələrində tərk ediblər. Onlar agentliyin son üç ilə aid (2014-2017) maliyyə, kargüzarlıq sənədlərinin və bir sıra digər sənədlərin surətlərini götürüblər.
Agentlik mühasibinin şəxsi noutbuku da götürülüb.
Yoxlama zamanı “Turan” əməkdaşlarının şəxsi əşyalarına, kompüterlərinin yaddaşına baxış keçirilib.
Bu ilin may ayında vergi orqanının apardığı kameral yoxlamada “Turan”a 3 min 744 manat 36 qəpik vergi məbləği hesablanıb. Agentliyin nazirliyə şikayətindən sonra işə yenidən baxılıb, qərar ləğv edilib. Ancaq avqustun 7-də Vergilər Nazirliyi yanında Bakı Şəhər Lokal Gəlirlər Departamenti agentliyə 26 min 907 manat 20 qəpik mənfəət vergisi hesablandığını bildirib. Avqustun 8-də Vergilər Nazirliyi yanında Vergi Cinayətlərinin İbtidai Araşdırılması Departamentinin nümayəndəsi agentliyə gələrək növbədənkənar səyyar vergi yoxlaması haqda qərar təqdim edib, mühasibat sənədlərini istəyib və təqdim edilməsi üçün 15 gün vaxt qoyub. Agentlik rəhbərliyi vəd verib ki, tələb olunan sənədlərin surətləri avqustun 17-də Vergi Cinayətlərinin İbtidai Araşdırılması Departamentinə təqdim olunacaq. Ancaq buna bir gün qalmış redaksiyada yoxlama keçirilib.
“Turan” agentliyinin rəhbərliyi yoxlamanın əsassız olduğu barədə şikayətlə 1 saylı Bakı İnzibati-İqtisad Məhkəməsinə müraciət edib.
