Ön xətdə yoxlama
Baş nazirin birinci müavini Yaqub Eyyubov və müdafiə naziri general-polkovnik Zakir Həsənov cəbhə zonasının ön xətdə yerləşən bölmələrinə baş çəkiblər. Xəbəri Mod.gov.az avqustun 15-də yayıb.
Rəsmi məlumata görə, düşmənlə qarşıdurma xəttindəki bölmələrdə hərbi qulluqçularla görüşən rəhbər heyətə döyüş şəraiti məruzə edilib. Baş nazirin birinci müavini və müdafiə naziri şəxsi heyətin döyüş və mənəvi-psixoloji hazırlığı, onların qidalanması, əsgər yataqxanaları, sosial-məişət şəraiti və digər hərbi obyektlərlə tanış olublar.
Baş nazirin birinci müavini və müdafiə naziri yeni inşa edilən hərbi şəhərcikdə yerinə yetirilən işlərin gedişini də yoxlayıblar. Məruzə edilib ki, hərbi şəhərcikdə su, qaz, istilik və digər kommunikasiya sistemləri ilə təmin olunmuş qərargah, əsgər yataqxanaları, yeməkxana, digər inzibati bina və qurğularla yanaşı məişət və ictimai iaşə kompleksləri, tibb məntəqəsi və digər infrastruktur obyektləri də nəzərdə tutulub.
