Məktəbli formalarının qiymətləri bəlli oldu
“Bu il məktəbli formalarının qiymətlərində heç bir dəyişiklik edilməyib. Aşağı siniflər üçün bir dəstin qiyməti 40 manat, yuxarı sinif şagirdləri üçün isə 46 manatdır”. Avqustun 16-da AZƏRTAC-a danışan Bakı Tikiş Evinin (BTE) satış şöbəsinin müdiri Etibar Əzimov belə deyib.
Əzimovun sözlərinə görə, BTE şagirdləri məktəbli forması ilə təmin etmək üçün hazırdır: “Məktəbli formalarının satışı zamanı sıxlığın aradan qaldırılması və vətəndaşların rahat alış-veriş etmələri üçün Bakı, Sumqayıt və Xırdalanda BTE-nin 15 filialı fəaliyyət göstərir. Məktəbli geyimlərini və onun aksessuarlarını dəst və fərdi şəklidə almaq olar. Eyni zamanda ilboyu BTE-nin bütün satış mərkəzlərində məktəbli forması və aksessuarları satılır”.
Satış şöbəsinin müdiri BTE-nin ”Qaynar xətt”inin fəaliyyət göstərdiyini vurğulayıb: (012) 597-45-39.
