“ASAN xidmət”də sahibkarlara neçə lisenziya verilib?
İqtisadiyyat Nazirliyi lisenziyalara dair hesabat yayıb. Rəsmi məlumatda qeyd olunur ki, 2 noyabr 2015-ci ildən lisenziyalar “ASAN xidmət” mərkəzləri vasitəsilə verilir. Həmin vaxtdan bəri sahibkarlıq subyektləri 4300-dən çox lisenziya alıb. Bu lisenziyaların 2450-dən çoxu yeni, 1871-i isə müddətsiz lisenziya ilə əvəz edilən lisenziyalardır.
2017-ci ilin ötən dövrü ərzində isə sahibkarlara 966 lisenziya verilib. Bunun 683-ü yeni, 283-ü müddətsizdir. Lisenziyalar əsasən əczaçılıq, özəl tibb, tikinti-quraşdırma işləri, tikintisinə icazə tələb olunan və barəsində məlumatlandırma icraatı tətbiq olunan bina və qurğuların layihələndirilməsi, baytarlıq preparatlarının satışı, bitki mühafizə vasitələrinin və aqrokimyəvi maddələrin idxalı, maye və təbii qaz təsərrüfatı obyektlərinin quraşdırılması, dağ-mədən işləri, dağ və buruq qazmalarının aparılması, yanğından mühafizə, qaldırıcı qurğuların, metallurgiya avadanlığının, təzyiq altında işləyən qazanların, tutumların quraşdırılması və təmiri, təhlükəli yüklərin nəqliyyat vasitəsilə daşınması, təhsil və s. fəaliyyət sahələrinə verilib.
