Üç maddə yanlışlığı aradan qaldırılmayıb
Bu il mayın 26-da Novator.az dövlət başçısının rəsmi saytı President.az-da Azərbaycan Konstitusiyasının xətalarla dərc olunmasına diqqət çəkmişdi.
2016-cı il sentyabrın 26-da keçirilmiş referendumda Azərbaycan Konstitusiyasına əlavə və dəyişikliklər edilib. Oktyabrın 12-də referendum aktı qüvvəyə minib.
Referendumla konstitusiyanın 9, 56, 85-ci maddələri də dəyişib. Ancaq Novator.az müşahidə edib ki, President.az-da 9, 56, 85-ci maddələr konstitusiyanın 26 sentyabr 2016-cı ilədək olan variantındakı kimidir. Novator.az mayın 26-dakı yazıda bunu təsdiqləyən fotosurətləri təqdim edib.
İyulun 14-də President.az-a nəzər yetirəndə məlum olub ki, dövlət başçısının rəsmi saytındakı yanlışlıq hələ aradan qaldırılmayıb.
Son referendumun nəticələrinə əsasən, konstitusiyanın 9, 56, 85-ci maddələri hazırda bu formadadır:
Maddə 9. Silahlı Qüvvələr
I. Azərbaycan Respublikası öz təhlükəsizliyini və müdafiəsini təmin etmək məqsədi ilə Silahlı Qüvvələr yaradır. Silahlı Qüvvələr Azərbaycan Ordusundan və başqa silahlı birləşmələrdən ibarətdir.
II. Azərbaycan Respublikası başqa dövlətlərin müstəqilliyinə qəsd vasitəsi kimi və beynəlxalq münaqişələrin həlli üsulu kimi müharibəni rədd edir.
III. Azərbaycan Respublikasının Prezidenti Azərbaycan Respublikası Silahlı Qüvvələrinin Ali baş komandanıdır.
Maddə 56. Seçki hüququ
I. Azərbaycan Respublikası vətəndaşlarının dövlət orqanlarına seçmək və seçilmək, habelə referendumda iştirak etmək hüququ vardır.
II. Məhkəmənin qərarı ilə fəaliyyət qabiliyyətsizliyi təsdiq olunmuş şəxslərin seçkilərdə, habelə referendumda iştirak etmək hüququ yoxdur.
III. Hərbi qulluqçuların, hakimlərin, dövlət məmurlarının, din xadimlərinin, məhkəmənin qanuni qüvvəyə minmiş hökmü ilə azadlıqdan məhrum edilmiş şəxslərin, bu Konstitusiyada və qanunda nəzərdə tutulan digər şəxslərin seçilmək hüququ qanunla məhdudlaşdırıla bilər.
Maddə 85. Azərbaycan Respublikası Milli Məclisinin deputatlığına namizədlərə aid tələblər
I. Azərbaycan Respublikasının seçkilərdə iştirak etmək hüququna malik olan hər bir vətəndaşı qanunla müəyyən edilmiş qaydada Azərbaycan Respublikası Milli Məclisinin deputatı seçilə bilər.
II. İkili vətəndaşlığı olan, başqa dövlətlər qarşısında öhdəliyi olan, icra və ya məhkəmə hakimiyyəti sistemlərində qulluq edən, elmi, pedaqoji və yaradıcılıq fəaliyyəti istisna olmaqla, başqa ödənişli fəaliyyətlə məşğul olan şəxslər, din xadimləri, fəaliyyət qabiliyyətsizliyi məhkəmə tərəfindən təsdiq edilən, ağır cinayətlərə görə məhkum olunmuş şəxslər, məhkəmənin qanuni qüvvəyə minmiş hökmü ilə azadlıqdan məhrumetmə yerlərində cəza çəkən şəxslər Azərbaycan Respublikasının Milli Məclisinə deputat seçilə bilməzlər.
