Sahibkarlara güzəştli kreditlər verilib
İqtisadiyyat Nazirliyinin Sahibkarlığa Kömək Milli Fondu iyulun 13-ü Masallı rayonunun Dəlləkoba kəndində işgüzar forum keçirib. Forumda 60-a yaxın sahibkar iştirak edib.
Rəsmi məlumata görə, forumda çıxış edən Sahibkarlığa Kömək Milli Fondunun icraçı direktorunun müavini Arif Vəliməmmədov deyib ki, 2017-ci ilin ötən dövrü ərzində 840 sahibkara 65,3 milyon manat güzəştli kredit verilib: “Bu investisiya layihələrinin reallaşdırılması 2600-ə yaxın yeni iş yerinin açılmasına imkan yaradır”.
İşgüzar forumda Masallı və ətraf rayonlarda fəaliyyət göstərən sahibkarlıq subyektləri 309 min manat güzəştli kredit alıb. Kreditlər heyvandarlıq, üzümçülük, əkinçilik, çayçılıq, istixana təsərrüfatlarının, çörək və mebel istehsalı sahələrinin inkişafına yönəldiləcək.
