Vəzifəli şəxs cərimələnərək prokurorluğa verildi
Ekologiya və Təbii Sərvətlər Nazirliyinin Ətraf Mühitin Mühafizəsi Departamentinin əməkdaşları yeni araşdırma aparıb. İyulun 13-də yayılan rəsmi məlumata görə, Xətai rayonu, Əbilov küçəsi, 12-də, yaşayış binasının yan tərəfindəki yaşıllıq sahəsində tut, dəfnə, zeytun, əncir cinsli 4 ədəd ağacın və 6 ədəd nar kolunun qanunsuz kəsildiyi aşkar edilib.
Ağacları ərazidə tikinti aparan 85 saylı Mənzil Kommunal İstismar Sahəsinin rəisi Zahid Bədəlovun kəsdiyi məlum olub. O, yaşıllıq sahəsində aparılan tikinti ilə bağlı hər hansı sənəd təqdim etməkdən imtina edib.
Qanun pozucusu barəsində akt tərtib olunaraq ağac və kolların məhv edilməsinə görə ona 6600 manat məbləğində ziyan tətbiq edilib. Məsələyə hüquqi qiymət verilməsi məqsədilə toplanmış materiallar Azərbaycan Respublikasının Baş Prokurorluğuna göndərilib.
