Türkiyədəki qiyama görə 50 mindən çox məhkum var
Türkiyədəki hərbi qiyam cəhdindən bir il ötür. 2016-cı il iyulun 15-də bir qrup hərbçi hakimiyyəti ələ almaq təşəbbüsü göstərib. Yüzlərlə adamın həlak olduğu qiyam yatırılıb. O vaxtdan ölkədə fövqəladə vəziyyət tətbiq olunur.
Hakimiyyət çevriliş cəhdinin ABŞ-da mühacirətdə olan islamçı alim Fətullah Gülənin planı olduğunu iddia edir.
Novator.az bildirir ki, Türkiyənin ədliyyə naziri Bəkir Bozdağın son açıqlamasına görə, 15 iyul 2016-cı ildən bu yana çevriliş cəhdi ilə bağlı 50 min 504 nəfər həbsə məhkum olunub. İstintaqa cəlb edilənlərin 8 min nəfərindən çoxu axtarışdadır.
Müdafiə Nazirliyinin açıqladığı məlumatda isə bildirilir ki, 15 iyul qiyamından sonra Türkiyə Silahlı Qüvvələrindən 150 general, admiral və 4 min 287-si zabit olmaqla 7 min 655 nəfər uzaqlaşdırılıb.
