Ən çox turist haradan gəlir?
Mədəniyyət və Turizm Nazirliyi bildirir ki, 2017-ci ilin birinci yarısında Azərbaycana 1 milyon 199 min 667 nəfər xarici vətəndaş səfər edib. Bu göstərici 2016-cı ilin ilk 6 ayı ilə müqayisədə (966 min 497 nəfər) 24% çoxdur.
6 ayda ölkəyə gələn xarici vətəndaşların ümumi sayında Rusiya 374 min 491 nəfərlə (17% artım) ilk yerdə qərar tutur. Sonrakı yerlərdə Gürcüstan (254 min 425 nəfər, 4% artım), İran (180 min 103 nəfər, 89% artım), Birləşmiş Ərəb Əmirlikləri (44 min 196 nəfər, 338% artım), Ukrayna (27 min 342 nəfər, 14% artım) və İraq (19 min 355 nəfər, 75% artım) vətəndaşları gəlir.
Türkiyədən Azərbaycana 138 min 692 nəfər səfər edib. Bu, ötən ilin ilk yarısı ilə müqayisədə 7,6% azalma deməkdir.
2016-cı ilin ilk 6 ayı ilə müqayisədə bu ilin ilk yarısında Omandan 16, Küveytdən 8, Səudiyyə Ərəbistanından 6, Qətərdən 5, Mərakeşdən 5, BƏƏ-dən 4,4, Pakistandan 3,5, Əlcəzairdən 3,5, İordaniyadan 2,2, Türkmənistandan 2 və İraqdan təxminən 1,5 dəfə çox turist gəlib.
Turist sayında MDB ölkələri üzrə 12%, Avropa İttifaqı ölkələri üzrə 13%, İran Körfəzi və Yaxın Şərq ölkələri üzrə 117%, Asiya ölkələri üzrə 64,4%, Afrika ölkələri üzrə 72%, Amerika və Avstraliya üzrə 22,8% artım olub.
