Minsk qrupunun həmsədrləri bəyanat yayıb
ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa)və Riçard Hoqland (ABŞ) Azərbaycan və Ermənistan xarici işlər nazirlərinin iyulun 11-i Brüsseldə keçirdiyi görüşlə bağlı bəyanat yayıb. Bəyanatda deyilir ki, həmsədrlər iyulun 11-də Azərbaycan və Ermənistan xarici işlər nazirləri Elmar Məmmədyarov və Edvard Nalbandyanla bir araya gəliblər. ATƏT sədrinin şəxsi nümayəndəsi Anjey Kasprşikin də iştirak etdiyi görüşdə cəbhə xəttindəki vəziyyət, Dağlıq Qarabağ münaqişəsinin tənzimlənməsi ilə bağlı görüləcək işlərin formatı müzakirə olunub. Xarici işlər nazirləri bu ilin sentyabrında BMT Baş Assambleyasının 72-ci sessiyası çərçivəsində görüşməyə razılıq veriblər.
APA-nın məlumatına görə, həmsədrlər ilin sonunda Azərbaycan və Ermənistan prezidentlərinin yüksək səviyyəli görüşünün təşkili üçün öz köməklərini təklif ediblər.
1988-ci ildə Azərbaycana hərbi təcavüzə başlayan Ermənistan Dağlıq Qarabağ bölgəsini və daha 7 rayonu işğal edib. 1994-cü ildə elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir. Minsk qrupunun 11 üzvü var: Rusiya, Fransa, ABŞ (hər üçü həmsədr), Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.
