Əmək müqaviləsi: elektron xidmətə nə qədər müraciət olunub?
İyun ayında Əmək və Əhalinin Sosial Müdafiəsi Nazirliyinin Əmək Müqaviləsi Bildirişi üzrə Elektron İnformasiya Sisteminə 279 min 438 müraciət qeydə alınıb, bu da 2016-cı ilin müvafiq dövrü ilə müqayisədə təqribən 2 dəfə çoxdur. Rəsmi hesabata görə, müraciətlərin 239 min 316-sı “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” elektron xidmətinə, 16 min 808-i “Əmək müqaviləsi bildirişləri barədə məlumatların işçilər tərəfindən əldə edilməsi” e-xidmətinə, qalanı isə “İş yerinə dair arayış” e-xidmətinə aid olub.
Əmək Müqaviləsi Bildirişi üzrə Elektron İnformasiya Sistemi əmək münasibətlərinin və bu münasibətlərdə baş verən dəyişikliklərin elektron qeydiyyatının aparılması yolu ilə rəsmiləşdirilməsinə və şəffaflaşdırılmasına xidmət edir. Sistem həmçinin işçilərə onlarla əlaqədar sistemə daxil edilən bildirişlər barədə məlumat öyrənmək, onlara lazım olan məlumatları elektron sənəd kimi formalaşdırmaq və ya kağız formasında çap etmək imkanı verir.
Tətbiqinə başlandığı 2014-cü ilin iyul ayından bəri Əmək Müqaviləsi Bildirişi üzrə Elektron İnformasiya Sisteminə 8,8 milyon dəfədən çox müraciət qeydə alınıb.
