İşğalçı rejim seçkiyə hazırlığı bitirir
Azərbaycanın Dağlıq Qarabağ bölgəsindəki işğalçı rejimin keçirəcəyi “prezident seçkisinə” namizədlərin irəli sürülməsi iyulun 12-də başa çatır. Novator.az-ın məlumatına görə, bu günə iki nəfər namizəd irəli sürülüb. Rejimin indiki başçısı Bako Saakyanı qondarma parlamentdəki Demokrat, Daşnaksütun və Azad Vətən partiyaları dəstəkləyir. “Hərəkat-88” fraksiyası Eduard Aqabekyanı namizəd göstərib.
İşğalçı rejimin bu il fevralın 20-də qəbul etdiyi yeni “konstitusiya” ilə Dağlıq Qarabağ “prezident respublikası”na çevrilib. “Ümumxalq seçkisi”ndə 5 il müddətinə seçilən “prezident” icra hakimiyyətinə rəhbərlik edəcək. Prezident və parlament “seçkiləri” eyni gündə keçiriləcək.
Bako Saakyanın səlahiyyət müddəti bu ay başa çatır. Növbəti “parlament seçkisi” isə 2020-ci ildə olmalıdır. Bu məqama görə işğalçı rejim “ana qanun”da keçid müddəası nəzərdə tutub. Keçid müddəasına əsasən, 2017-ci ilin iyul ayında “prezidenti” “parlament” seçəcək və onun səlahiyyət müddəti 3 il olacaq. 2020-ci ildə isə “prezident” və “parlament” seçkilərini eyni gündə keçirmək nəzərdə tutulur.
Bako Saakyan işğalçı rejimə 2007-ci ildən rəhbərlik edir. O, 1960-cı ildə Xankəndidə doğulub. 1990-cı ildə separatçıların qanunsuz hərbi birləşmələrinə qoşulub, məsul vəzifələr tutub. 1997-1999-cu illərdə Bako Saakyan Ermənistanın daxili işlər və milli təhlükəsizlik nazirinin köməkçisi vəzifəsində çalışıb. 1999-2001-ci illərdə “DQR”in “daxili işlər naziri” işləyib. 2001-ci ildən “milli təhlükəsizlik idarəsinin rəisi” olub, 2007 və 2012-ci illərdə “prezident” seçilib.
