Neftin qiyməti və yeni proqnoz
İyulun 11-i Nyu-York birjasında “Layt” markalı neftin bir barreli 45,49 dollara, London birjasında “Brent” markalı neftin bir barreli 47,86 dollara satılır. “AzəriLayt” markalı neftin bir barreli isə 47,59 dollara təklif olunur.
AZƏRTAC-ın məlumatına görə, Rusiyanın energetika naziri Aleksandr Novak CNBC telekanalına müsahibəsində deyib ki, üçüncü rübdə dünya bazarında neftə tələbat arta bilər: “Ölkələr bazarda artıq məhsuldan qaçmağa çalışır. Əminik ki, üçüncü rübdə tələbat artacaq, bu da hasilatı sutkada 1,8 milyon barrel azaltmağa imkan verəcək”.
Nazir qeyd edib ki, qiymət böhranı hələ aradan qalxmayıb, lakin neft hasilatının azaldılması barədə razılaşma bazarda özünü göstərir: “Biz müsbət təsiri görürük. Vəziyyət yarım il bundan əvvəl olduğundan daha yaxşıdır”.
Novator.az xatırladır ki, iri neft ölkələrini birləşdirən OPEK-in Nazirlər Şurası bu il mayın 25-də neft hasilatının azaldılması barədə sazişin müddətini 2018-ci il aprelin 1-dək uzadıb. Təşkilata daxil olmayan 11 ölkə, o cümlədən Azərbaycan bu razılaşmaya qoşulub.
OPEK bu il yanvarın 1-dən gündəlik hasilatı 1,2 milyon barrel azaltmış, təşkilata daxil olmayan ölkələr 558 min barrel azaldıb. Azərbaycan gündəlik hasilatı 35 min barrel azaltmağa razı olub.
