Firma ekologiyaya 7920 manatlıq ziyan vurub
Ekologiya və Təbii Sərvətlər Nazirliyinin Ətraf Mühitin Mühafizəsi Departamenti yeni araşdırma aparıb. Rəsmi məlumata görə, araşdırma zamanı Nizami rayonu, Mehdi Abbasov küçəsi, 4c ünvanında, “Planet” şadlıq sarayının arxa hissəsindəki yaşıllıq sahəsində sərv, Eldar şamı və qarağac cinsli 9 ədəd ağacın qanunsuz kəsildiyi, 20 ağacın isə gövdə və çətir hissələrinin ciddi zədələndiyi məlum olub.
Ağacları ərazidə tikinti aparan “Karvan-K” istehsalat-kommersiya firmasının kəsdiyi və zədələdiyi müəyyən edilib. Özünü “Planet” şadlıq sarayının rəhbəri kimi təqdim edən Talıb Quliyev ağacların onun göstərişi ilə kəsildiyini bildirib. Lakin o, yaşıllıq sahəsində aparılan tikinti ilə bağlı hansısa sənəd təqdim etməkdən imtina edib.
Faktla bağlı tikintini həyata keçirən “Karvan-K” firması barəsində akt tərtib olunaraq 7920 manat məbləğində ziyan tətbiq edilib. Məsələyə hüquqi qiymət verilməsi, təqsirkar şəxslər barədə qanuna müvafiq tədbirlərin görülməsi və ərazidəki digər ağacların məhv edilməsi təhlükəsinin qarşısının alınması məqsədilə toplanmış materiallar Baş Prokurorluğa göndərilib.
