İlham Əliyev ABŞ-ın dövlət katibi ilə görüşüb
Prezident İlham Əliyev 22-ci Dünya Neft Konqresində iştirak etmək üçün Türkiyədə səfərdədir.
Səfər çərçivəsində o, iyulun 10-da İstanbulda ABŞ-ın dövlət katibi Reks Tillersonla görüşüb. AZƏRTAC xəbər verir ki, görüşdə ikitərəfli əlaqələrin müxtəlif sahələrdə, o cümlədən siyasi və enerji sahələrində uğurla inkişaf etdiyi qeyd olunub.
Söhbət zamanı Ermənistan-Azərbaycan, Dağlıq Qarabağ münaqişəsinin həlli ilə bağlı məsələlər müzakirə edilib. Prezident İlham Əliyev münaqişənin həlli ilə bağlı Azərbaycanın mövqeyini bir daha bildirib, Ermənistanın təmas xəttində son hərbi təxribatı haqqında məlumat verib.
İlham Əliyev Cənub Qaz Dəhlizi layihəsinin icrası ilə bağlı görülən işlərdən danışıb.
Reks Tillerson qeyd edib ki, ABŞ bu layihənin həyata keçirilməsinə bundan sonra da dəstək verəcək.
ABŞ-ın dövlət katibi Azərbaycanın Əfqanıstandakı sülhməramlı əməliyyatlarda fəaliyyətini, eyni zamanda ölkənin bu əməliyyatlarda logistik və nəqliyyat dəhlizi rolunu yüksək qiymətləndirib.
Söhbət zamanı Azərbaycanda həyata keçirilən siyasi və iqtisadi islahatlar, demokratiyanın inkişafı ilə bağlı məsələlər də müzakirə edilib.
