Azərbaycan komandalarının yeni mümkün rəqibləri
İyulun 14-ü UEFA-nın klub turnirlərində üçüncü raundların püşkü atılacaq. Novator.az-ın məlumatına görə, Azərbaycanı Çempionlar Liqasında təmsil edən “Qarabağ” komandası güclülər səbətində yer alır. İkinci mərhələdə “Qarabağ” Gürcüstanın “Samtredia” klubu ilə üz-üzə gəlir. Bu səddi keçəcəyi halda “Qarabağ”ın üçüncü mərhələdə Çexiyanın “Slaviya”, Rumıniyanın “Viitorul” klublarına rəqib olması mümkündür.
Avropa Liqasında Azərbaycanı “İnter”, “Zirə” və “Qəbələ” təmsil edir. İkinci mərhələdə “İnter” Lüksemburqun “Fola” klubu, “Zirə” Rumıniyanın “Astra” komandası, “Qəbələ” Polşanın “Yaqelloniya” klubu ilə mübarizə aparır. Mərhələ adlayacaqları halda hər üç Azərbaycan klubu üçüncü raundda zəiflər səbətində qərar tutacaq. Püşk Azərbaycan klublarına bu komandaları qismət edə bilər: “Zenit”, “Krasnodar” (Rusiya), “Atletik” (İspaniya), “Fənərbaxça” (Türkiyə), “Sparta” (Çexiya), “Milan” (İtaliya), PSV (Hollandiya), “Braqa”, “Maritimu” (Portuqaliya), “Gent” (Belçika), PAOK, “Panatinaikos” (Yunanıstan), “Bordo”, “Marsel” (Fransa), “Everton” (İngiltərə), “Dinamo” (Xorvatiya), “Frayburq” (Almaniya), “Austria” (Avstriya), “Syon” (İsveçrə).
