Rusiyanın məhbus statistikası
On ildə Rusiyada məhbusların sayı 696 min nəfərdən 519 min nəfərə düşüb. Novator.az-ın məlumatına görə, Cəzaların İcrası Federal Xidməti iyulun 6-da belə hesabat yayıb.
Rəsmi hesabatda 2006 və 2016-cı illərin göstəriciləri yer alır. Bildirilir ki, on ildə üçüncü və ya dördüncü dəfə məhkum olunanların sayı çoxalıb. 2006-cı ildə belə məhkumların sayı 144 min nəfər, 2016-cı ildə isə 202 min nəfər olub.
2016-cı ilin göstəricilərində həbsxanalardakı şəxslərin 125 min nəfərinin ikinci dəfə məhkum olunduğu qeyd edilir.
İlk dəfə məhkum olunanların sayı isə 2006-cı ildəki 367 min nəfərdən 2016-cı ildə 192 min nəfərə düşüb.
Hesabatda bildirilir ki, 2016-cı ildə Rusiya həbsxanalarındakı məhbusların 130 min nəfərə qədəri adam öldürməyə görə həbsə düşüb.
Narkotiklə bağlı məhkum olunanların sayı 2006-cı ildə 65 min nəfər olub, 2016-cı ildə 138 min nəfərə çatıb.
Rusiya həbsxanalarındakı məhbusların 80%-nin 25-55 yaş arası kişilər olduğu vurğulanır.
Məhkumların 15%-i 18-25 yaşlı gənclər, 3%-i 55-60 yaş arası şəxslər, 1,5%-i 60 yaşdan yuxarı şəxslərdir.
Həbsdə yatanların 43%-i beş ilədək, 35%-i beş-on il arası, 12%-i on-on beş il arası, 6,2%-i on beş ildən yuxarı müddətə iş alıb.
Səidə Hüseynova
