Lukaşenko 4 iyul faciəsindən danışıb
Belarus prezidenti Aleksandr Lukaşenko Ermənistan silahlı birləşmələrinin Füzuli rayonunun Alxanlı kəndini atəşə tutması nəticəsində azyaşlı da daxil olmaqla 2 dinc sakinin ölümü və 1 nəfərin yaralanmasına reaksiya verib. Bunu AZƏRTAC-a açıqlamasında Milli Məclis sədrinin müavini, Azərbaycanın ATƏT Parlament Assambleyasındakı nümayəndə heyətinin rəhbəri Bahar Muradova deyib.
Bahar Muradova qeyd edib ki, iyulun 5-i Minskdə Belarus prezidenti ilə ATƏT Parlament Assambleyasının 26-cı illik sessiyasının rəsmi açılış mərasimində bir araya gəlib. Ayaqüstü qısa görüş zamanı Aleksandr Lukaşenkonun ilk sözü Azərbaycan və Ermənistan qoşunlarının təmas xəttində iyulun 4-də baş vermiş insident barədə olub. Prezident hadisədən məlumatlı olduğunu bildirərək təəssüfünü ifadə edib.
İyulun 4-də işğalçı erməni qoşunları Füzuli rayonunun Alxanlı kəndini atəşə tutub. Düşmən təxribatı nəticəsində 2 yaşlı Zəhra Quliyeva və onun 51 yaşlı nənəsi Sahibə Allahverdiyeva həlak olub, 52 yaşlı Səlminaz Quliyeva isə ağır yaralanıb.
