Jurnalistika fakültəsinə dekan seçilib
Vüqar Zifəroğlu Bakı Dövlət Universitetinin jurnalistika fakültəsinin dekanı seçilib. Məlumatı Modern.az yayıb.
Universitetin mətbuat xidmətinin rəhbəri Pərvanə İbrahimova xəbəri təsdiqləyib.
Əliyev Vüqar Zifər oğlu 1978-ci il oktyabrın 12-də Bakıda doğulub. 1999-cu ildə Bakı Dövlət Universitetinin jurnalistika fakültəsini bakalavr, 2001-ci ildə magistr dərəcəsi ilə bitirib. Sonrakı illərdə fakültənin dissertantı və doktorantı olub.
Beynəlxalq jurnalistika kafedrasında baş laborant, müəllim kimi çalışıb, universitetin “Jurnalistika” Elmi Tədqiqat Laboratoriyasının müdiri işləyib.
Filologiya elmləri üzrə fəlsəfə doktoru (2005), beynəlxalq jurnalistika üzrə dosentdir (2014).
Beynəlxalq jurnalistikaya dair bir sıra əsərlərin, tədris vəsaitlərinin müəllifidir.
Bədii yaradıcılıqla da məşğul olur, 2013-cü ildə “Sirr” adlı romanı işıq üzü görüb.
Novator.az bildirir ki, Bakı Dövlət Universitetində jurnalist kadrlarının hazırlığına 1928-ci ildən başlanıb. Həmin il jurnalizm kafedrası yaradılıb. 1945-ci ildə universitetin filologiya fakültəsində jurnalistika şöbəsi açılıb. 1969-cu ildə şöbə müstəqil fakültəyə çevrilib. Fakültənin ilk dekanı Nurəddin Babayev olub. Sonrakı illərdə dekan vəzifəsinə Şirməmməd Hüseynov, Seyfulla Əliyev, Tofiq Rüstəmov, Nəriman Zeynalov, Akif Rüstəmov, Yalçın Əlizadə, Şamil Vəliyev seçiliblər. Son vaxtlar Cahangir Məmmədli dekan əvəzi idi. 2017-ci il mayın 12-dən isə dekanı əvəz etmək Vüqar Zifəroğluna həvalə olunmuşdu.
Jurnalistika fakültəsində təhsil bakalavr və magistratura pillələri üzrə Azərbaycan (əyani və qiyabi) və rus (əyani) dillərində aparılır.
