İlham Əliyev və Mehriban Əliyevanın reaksiyaları
Prezident İlham Əliyev və birinci vitse-prezident Mehriban Əliyeva 4 iyul faciəsinə münasibət bildiriblər.
İyulun 4-də işğalçı erməni qoşunları Füzuli rayonunun Alxanlı kəndini mina və qumbaraatanlardan atəşə tutub. Düşmən təxribatı nəticəsində 2 yaşlı Zəhra Quliyeva və onun 51 yaşlı nənəsi Sahibə Allahverdiyeva həlak olub, 52 yaşlı Səlminaz Quliyeva isə ağır yaralanıb.
Prezident İlham Əliyev “Twitter”də olaya bu sözlərlə reaksiya verib: “Dünya ictimaiyyəti günahsız insanların qətlinə göz yummamalıdır”.
Birinci vitse-prezident Mehriban Əliyeva isə “Twitter”də “Azərbaycan erməni işğalına, günahsız insanların qətlə yetirilməsinə qarşıdır!” yazıb.
4 iyul faciəsi ilə atəşkəs rejimi dövründə erməni terrorunun qurbanı olan azərbaycanlı uşaqların sayı 33-ə çatıb. Ailə, Qadın və Uşaq Problemləri üzrə Dövlət Komitəsi bildirir ki, həmin uşaqlardan 14-ü həlak olub, 19-u isə yaralanıb. Həlak olan sonuncu uşaq Zəhra Quliyevadır.
Dağlıq Qarabağ münaqişəsi 1988-ci ilin fevral ayından başlanıb. 1991-1993-cü illərdə ermənilər Dağlıq Qarabağı və onun ətrafındakı 7 rayonu işğal edib.
1994-cü ilin mayında atəşkəs sazişi imzalanıb. Sazişə Azərbaycan və Ermənistanın müdafiə nazirləri, eləcə də Dağlıq Qarabağdakı erməni silahlılarının komandanı imza atıb.
