Rusiyadan Azərbaycana erməni tələbi
Rusiya Xarici İşlər Nazirliyi Azərbaycan dövlətinə tələb qoyub. Novator.az-ın məlumatına görə, rəsmi Moskva Azərbaycanı erməni əsilli Rusiya vətəndaşlarına münasibəti dəyişməyə çağırır. Nazirlik qeyd edir ki, Rusiya vətəndaşları Azərbaycanda etnik mülahizələrlə ayrı-seçkiliyə məruz qalır.
İyulun 5-i Tass.ru-da yayılan məlumatda bildirilir ki, 2017-ci ildə Rusiyanın 25 vətəndaşı Azərbaycana buraxılmayıb. Həmin şəxslərin bir neçə saatlığa saxlandığı, bəzi hallarda yeməksiz, susuz, tibbi yardımsız qaldığı, sonra öz hesablarına ölkədən çıxarıldığı vurğulanır.
Nazirlik bildirir ki, deportasiyaya əsas kimi Rusiya vətəndaşlarının erməni soyadı daşıması göstərilib, ancaq rus ad-soyadlı vətəndaşların erməni əcdadı üzə çıxarmaq üçün sorğu-suala məruz qaldığı hallar da olub.
Xarici İşlər Nazirliyi qeyd edir ki, dəfələrlə Azərbaycan rəsmilərindən bu praktikaya son qoymaq tələb olunsa da, qarşı tərəfdən aydın və qaneedici cavab alınmayıb.
Səidə Hüseynova
