Məktəb yaşı: bizdə və xaricdə
Azərbaycanda ümumtəhsil məktəblərinin birinci sinfinə 6 yaşı sentyabrın 15-dək tamam olan uşaqlar qəbul edilir.
Təhsil Nazirliyinin “Şagirdlərin ümumtəhsil məktəblərinə qəbulu və yerdəyişməsi haqqında qaydalar”ında o da qeyd olunur ki, xüsusi istedadlı uşaqların vaxtından əvvəl birinci sinfə qəbuluna yol verilir. Bu zaman 6 yaşı 16 sentyabr-31 oktyabr müddətində tamam olan istedadlı uşaqların vaxtından əvvəl birinci sinfə qəbulu məktəbdə təşkil edilən komissiyanın rəyi əsasında həyata keçirilir.
6 yaşı noyabr ayı ərzində tamam olmuş xüsusi istedadı ilə fərqlənən uşaqların vaxtından əvvəl ilk sinfə qəbuluna Təhsil Nazirliyində yaradılan komissiya baxıb müvafiq qərar qəbul edir.
Sovet təhsil sistemində isə uşaqlar bir qayda olaraq 7 yaşın tamamında orta təhsilə başlayırdı.
Birinci sinfə qəbul yaşı digər keçmiş sovet respublikalarında da dəyişib.
Novator.az bildirir ki, Rusiyada ibtidai sinfə qəbul üçün uşağın minimum 6 yaş altı ayı tamam olmalıdır.
Moldova, Qazaxıstan, Qırğızıstan və Latviyada birinci sinfə qəbul 6-7 yaşından aparılır.
Ukrayna, Belarus, Gürcüstan, Özbəkistan və Ermənistanda uşaqlar məktəbə 6 yaşın tamamında gedir.
Litvada və Estoniyada isə ibtidai təhsilə başlama yaşı dəyişməyib, sovet dövründə olduğu kimi uşağın 7 yaşı tamam olmalıdır.
Bir sıra ölkələrdə uşaqlar təhsilə hətta 5 yaşından cəlb edilir.
Amerikalı uşaqlar ibtidai sinfə 5 yaşı tamam olanda gedir, bu pillə üzrə təhsil 5-6-cı sinfə qədər davam edir.
Türkiyə və Böyük Britaniyada da ilk sinfə qəbul 5 yaşdan başlanır.
İranda on iki illik ümumi təhsil 6 yaşından başlanır. Almaniya da uşaqlar bu yaşda məktəbə gedir.
