Atəşkəs dövründə neçə uşaq erməni terrorunun qurbanı olub?
Atəşkəs rejimi dövründə erməni terrorunun qurbanı olan azərbaycanlı uşaqların sayı 33-ə çatıb.
Novator.az-ın məlumatına görə, Ailə, Qadın və Uşaq Problemləri üzrə Dövlət Komitəsinin iyulun 5-də yaydığı açıqlamada deyilir ki, həmin uşaqlardan 14-ü həlak olub, 19-u isə yaralanıb.
Həlak olan sonuncu uşaq 2 yaşlı Zəhra Quliyevadır.
Zəhra Quliyeva iyulun 4-də erməni işğalçılarının Füzuli rayonunun Alxanlı kəndini mina və qumbaraatanlardan atəşə tutması nəticəsində həlak olub. Düşmən təxribatı zamanı Zəhranın nənəsi, 1966-cı il təvəllüdlü Sahibə Allahverdiyeva da həyatını itirib. Digər mülki şəxs, 1965-ci il təvəllüdlü Səlminaz Quliyeva isə ağır yaralanıb.
Dağlıq Qarabağ münaqişəsi 1988-ci ilin fevral ayından başlanıb. 1991-1993-cü illərdə Dağlıq Qarabağ və onun ətrafındakı 7 rayon işğal edilib.
1994-cü ilin mayında atəşkəs sazişi imzalanıb. Sazişə Azərbaycan və Ermənistanın müdafiə nazirləri, eləcə də Dağlıq Qarabağdakı erməni silahlılarının komandanı imza atıb.
