Təbrikdə Qarabağ mesajı
Prezident İlham Əliyev amerikalı həmkarı Donald Trampa təbrik məktubu göndərib. Donald Trampı iyulun 4-də qeyd olunan ABŞ-ın Müstəqillik Günü münasibətilə təbrik edən dövlət başçısı yazır ki, iki ölkənin münasibətləri diplomatik əlaqələrin qurulmasından sonra ötən 25 il ərzində dostluq və əməkdaşlıq zəminində dinamik və hərtərəfli inkişaf edərək strateji tərəfdaşlıq səviyyəsinə yüksəlib: “Enerji təhlükəsizliyinin təmin olunması sahəsində Azərbaycanın həyata keçirdiyi irimiqyaslı transmilli layihələrə ABŞ-ın mühüm və davamlı dəstəyi, beynəlxalq terrorizmə qarşı mübarizədə, Əfqanıstanda sülhyaratma missiyasında ölkələrimizin yaxından və səmərəli əməkdaşlığı tərəfdaşlığımızı səciyyələndirən başlıca amillərdəndir”.
İlham Əliyev qeyd edir ki, Azərbaycan Ermənistanın təcavüzü nəticəsində işğal olunmuş torpaqların azad edilməsi, qaçqın və məcburi köçkün vəziyyətinə düşmüş bir milyondan çox azərbaycanlının doğma yurd-yuvalarına qayıtması üçün Dağlıq Qarabağ münaqişəsinin Azərbaycanın ərazi bütövlüyü çərçivəsində, sülh yolu ilə və ədalətli həllində ATƏT-in Minsk qrupunun həmsədri kimi ABŞ-ın səylərinə böyük ümidlər bəsləyir.
