Meşədə yoxlama, cəza və təkrar yoxlama
Ekologiya və Təbii Sərvətlər Nazirliyinin Meşələrin İnkişafı Departamenti aprel ayında Oğuz Meşə Mühafizəsi və Bərpası Müəssisəsində vəziyyəti araşdırıb. İyulun 4-də yayılan rəsmi məlumata görə, 10 meşə dolayında həyata keçirilən yoxlamada ümumilikdə 2061,5 kubmetr həcmində 16204,99 manat məbləğində qanunsuz qırıntı aşkar edilib. Nöqsan və qanun pozuntularının qarşısının alınması, həmçinin belə halların bir daha təkrar olunmaması, iş və icra intizamının günün tələbi səviyyəsində təmin edilməsi məqsədilə 4 mühafizə işçisi işdən çıxarılıb, 7 nəfər barəsində isə ciddi intizam tənbehi tədbirləri görülüb. Araşdırma materialları Baş Prokurorluğa göndərilib, qanunsuz ağac kəsilməsi faktı üzrə cinayət işi başlanıb, hazırda iş istintaqdadır.
Oğuzda aparılmış bu yoxlamanın nəticələrinin müəssisənin fəaliyyətində dönüş yaradıb-yaratmamasını araşdırmaq məqsədilə nazirlikdə yaradılmış komissiya 20-25 iyunda meşələrin qorunub mühafizə olunması vəziyyətini yenidən yoxlayıb. Yoxlama zamanı 9 meşə dolayında, ümumilikdə 292,52 kubmetr həcmində, 1834,30 manat kök üstə nırx dəyərində qanunsuz qırıntı aşkar edilib. Görülmüş intizam tənbehi tədbirlərindən nəticə çıxarılmadığına, əksinə, qanunsuzluqlara təkrar yol verildiyinə görə Oğuz Meşə Mühafizəsi və Bərpası Müəssisəsində meşələrin qorunub mühafizə olunması vəziyyətinin kompleks araşdırılıb başa çatdırılması məqsədilə növbəti dəfə geniş tərkibdə komissiya yaradılıb. Aparılacaq araşdırmaların obyektiv, hərtərəfli tam həyata keçirilməsi və bu zaman kənar təsirlərin minimuma endirilməsi məqsədilə müəssisənin direktoru Bayram Umarov tutduğu vəzifədən azad edilib.
