Cocuq Mərcanlı: təmizləmə əməliyyatları başa çatıb
Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) Cəbrayıl rayonunun Cocuq Mərcanlı kəndində aparılan təmizləmə əməliyyatları ilə əlaqədar yekun məlumat yayıb.
Ermənistan silahlı birləşmələri Cocuq Mərcanlını 1993-cü ilin oktyabrında tutub. 1994-cü ilin yanvarında Azərbaycan Ordusu kəndi işğaldan azad edib. 2016-cı ilin aprel ayından ordu ətraf ərazilərə nəzarət edir və Cocuq Mərcanlı kəndində insanların təhlükəsiz yaşaması mümkün olub.
ANAMA bildirir ki, 126 gün çəkən əməliyyatlar 2 milyon 983 min 738 kvadratmetr (298,37 hektar) ərazini əhatə edib. Beləliklə, yanvarın 25-dən iyulun 3-dək Cocuq Mərcanlı kəndində aparılan təmizləmə əməliyyatları başa çatdırılıb. Nəticədə ilkin mərhələdə 50 yaşayış evi, daha sonra 100 yaşayış evinin tikilməsi nəzərdə tutulan ərazi, avtomobil yolu ərazisi və kənd təsərrüfatı üçün nəzərdə tutulan otlaq və əkin sahələri mina və partlamamış hərbi sursatlardan təmizlənib.
