Saakyanın səlahiyyət müddəti uzanır
Azərbaycanın Dağlıq Qarabağ bölgəsində qurulmuş işğalçı rejimin hakim Demokrat Partiyası Bako Saakyanın yenidən “prezident” seçilməsini istəyir. Novator.az-ın məlumatına görə, partiya iyulun 1-i Xankəndidə keçirilən qurultayında “parlament fraksiyasına” Bako Saakyanı prezidentliyə namizəd irəli sürmək səlahiyyəti verib.
İşğalçı rejimin bu il fevralın 20-də qəbul etdiyi yeni “konstitusiya” ilə Dağlıq Qarabağ “prezident respublikası”na çevrilib. “Ümumxalq seçkisi”ndə 5 il müddətinə seçilən “prezident” icra hakimiyyətinə rəhbərlik edəcək. Prezident və parlament “seçkiləri” eyni gündə keçiriləcək.
Rejimin indiki başçısı Bako Saakyanın səlahiyyət müddəti bu ay başa çatır. Növbəti “parlament seçkisi” isə 2020-ci ildə olmalıdır. Bu məqama görə işğalçı rejim “ana qanun”da keçid müddəası nəzərdə tutub. Keçid müddəasına əsasən, 2017-ci ildə, iyul ayında “prezidenti” “parlament” seçəcək və onun səlahiyyət müddəti 3 il olacaq. 2020-ci ildə isə “prezident” və “parlament” seçkilərini eyni gündə keçirmək nəzərdə tutulur.
Bako Saakyan işğalçı rejimə 2007-ci ildən rəhbərlik edir.
