Bakıda “Holi” məyusluğu
İyulun 1-2-də Bakıda Xəzər dənizinin sahilində keçirilməsi nəzərdə tutulan “Holi” rənglər festivalı təxirə salınıb.
Festivalın təşkilatçısı “TS Production”dır.
İyulun 1-i səhər saat 11-dən iştirakçılar tədbirin keçirilməli olduğu yerə toplaşaraq festivala start verilməsini gözləyiblər. Uzun gözləmələrdən və iştirakçıların etirazlarından sonra, nəhayət, axşam saat 6-da onlara bildirilib ki, festival təxirə salınır.
Bu müddətdə təşkilatçılar tədbirə biletlə qatılan gənclərin festivalın keçirilməli olduğu məkanı tərk etməsinin də qarşısını alıblar. Onlar deyiblər ki, məkanı tərk edənin geri qayıtmasına icazə verilməyəcək. Nəticədə tədbirin təxirə salınmasından xəbərsiz gənclər axşamadək ərazidə dayanıb gözləməli olublar.
Təşkilatçılar festivalın təxirə salınmasına səbəb kimi tədbirdə istifadə olunacaq boyaların gömrükdən keçməməsini göstəriblər.
“Tonlarla rəng tozları, minlərlə xoşbəxt üz” devizi ilə bir ay ərzində biletləri satılan festivalın iyulun 8-də keçiriləcəyi elan olunub.
Məyus gənclər festival təşkilatçılarını tibbi təhlükəsizlik tədbirlərini də qeyri-peşəkar təşkil etməkdə günahlandırıblar.
Xatırladaq ki, festivala biletlər paytaxtın bütün kassalarında və Asan Xidmət mərkəzlərində satılıb.
Xədicə Həsənova
