Uğurlu start
UEFA Avropa Liqasının ilk mərhələsində start Azərbaycan paytaxtının iki komandası üçün uğurlu olub. Novator.az-ın məlumatına görə, iyunun 29-da “İnter” Serbiyada “Mladost”u 3:0 hesabı ilə məğlub edib, “Zirə” isə evdə Lüksemburqun “Differdanj” komandasını üstələyib – 2:0.
Cavab görüşləri iyulun 6-da keçiriləcək. Mərhələ adlayacağı halda “İnter” növbəti raundda “Fola” (Lüksemburq) – “Milsami” (Moldova) cütlüyünün qalibinə (ilk oyun 2:1 hesabı ilə bitib), “Zirə” Rumıniyanın “Astra” klubuna rəqib olacaq.
Turnirə ikinci mərhələdən qoşulacaq “Qəbələ” ilk raunddakı “Dinamo” (Batumi, Gürcüstan) – “Yaqelloniya” (Polşa) cütlüyünün qalibini gözləyir (ilk oyunda polyaklar 1:0 hesabı ilə üstün gəlib).
Çempionlar Liqasında ikinci mərhələdən start götürəcək “Qarabağ” Gürcüstanın “Samtredia” klubu ilə üz-üzə gəlir. İlk oyun iyulun 11-i Bakıda keçiriləcək.
